Bola bogʻchada kuniga 1–3 mahal ovqatlanadi va oʻnlab marta narsalarga tegadi. Ovqat va tozalik — sogʻligʻiga eng koʻp taʼsir qiladigan ikki narsa.

Menyu deyarli har doim chiroyli. Quyida — qogʻozdan tashqarida nimani koʻrish kerakligi.

Oshxona

Soʻrang: "Oshxonani koʻrsam boʻladimi?"

Sanitariya qoidasi sabab ichkariga kiritmasligi mumkin — bu normal. Unda eshikdan turib koʻrishni soʻrang. Butunlay rad etish esa savol tugʻdiradi.

Koʻrganingizda:

  • Ovqat shu yerda pishadimi yoki tashqaridan keltiriladimi? Keltirilsa — kimdan, qanday tashiladi, qancha vaqt yoʻlda boʻladi?
  • Muzlatgich — ichida nima bor? Ochiq qolgan, sanasi yoʻq idishlar bormi?
  • Xom va tayyor mahsulot alohida saqlanadimi?
  • Idish-tovoq qayerda yuviladi? Quritish uchun joy bormi?
  • Chiqindi oshxonada turibdimi yoki alohida chiqariladimi?
  • Oshxona xodimida fartuk va bosh kiyim bormi?

Menyu

Soʻrang: "Bugungi menyuni koʻrsating. Kechagisi qani?"

  • Menyu koʻrinadigan joyda osilganmi (ota-onalar oʻqiy oladigan)?
  • Har kuni oʻzgaradimi yoki bir hafta bir xilmi?
  • Bugun beriladigan ovqat menyuda yozilgani bilan mos keladimi?

Bir hafta menyusini rasmga oling va uyda koʻrib chiqing: sabzavot bormi, meva bormi, doim bir xil garnir emasmi.

Allergiya: "Bolamda allergiya bor. Siz buni qanday hisobga olasiz?" Javob aniq boʻlishi kerak — kim biladi, qayerda yozilgan, alternativ nima beriladi. "Aytasiz, biz eslab qolamiz" — yetarli emas.

Ovqatlanish tartibi

  • Bolalar qayerda ovqatlanadi — alohida stolmi yoki guruh xonasidami?
  • Ovqatga qancha vaqt beriladi? (shoshiltirish — koʻp uchraydigan muammo)
  • Bola yemasa nima boʻladi? Majburlashadimi?
  • Suv kun davomida ochiqmi yoki faqat ovqat vaqtida?

Oxirgisi muhim: bola xohlagan payt suv icha olishi kerak.

Majburlash haqidagi javobga eʼtibor bering. "Yemasa yemaydi, keyin ochiqadi" — normal. "Tarelkasini boʻshatmaguncha turgʻizmaymiz" — bu ovqat bilan bogʻliq muammolarni keltirib chiqaradi.

Hojatxona

Bolalar hojatxonasini soʻrang, kattalarnikini emas.

  • Toza va hidsizmi?
  • Sovun bormi va bola yeta oladigan balandlikdami?
  • Qoʻl artish uchun nima bor — har bolaga alohida sochiqmi, bir martalik qogʻozmi, yoki umumiy sochiqmi?
  • Bola yordam soʻrasa kim yordam beradi?
  • Tuvalatga oʻrganmagan bola uchun tartib qanday?

Umumiy sochiq — infeksiya tarqalishining eng oddiy yoʻli. Buni koʻrsangiz soʻrang.

Qoʻl yuvish

Bu — kasallikni kamaytiradigan eng arzon va eng samarali chora.

Soʻrang: "Bolalar qachon qoʻl yuvadi?"

Yaxshi javob: kelganda, ovqatdan oldin, hojatxonadan keyin, sayrdan qaytganda.

Va kim nazorat qiladi — bolalar oʻzlari yuvadimi yoki kattalar qarab turadimi? Kichik bolalar nazoratsiz to'g'ri yuvmaydi.

Kasal bola

Bu qoidani oldindan bilishingiz kerak:

  • Bola kasal boʻlsa qabul qilinmaydigan chegara nima (harorat, yoʻtal, toshma)?
  • Kun davomida kasal boʻlsa — qayerda kutadi, kim qaraydi, qachon qoʻngʻiroq qilinadi?
  • Qaytish uchun spravka kerakmi?
  • Guruhda yuqumli kasallik chiqsa ota-onalar xabardor qilinadimi?

Oxirgisi muhim: bogʻcha yuqumli kasallikni yashirsa, siz bolangizni himoya qila olmaysiz.

Ogohlantiruvchi javob: "Kasal bolani ham qabul qilaveramiz, ota-onalar ishlaydi-ku". Bu sizga qulay koʻrinishi mumkin, lekin boshqalarning kasal bolasi ham qabul qilinadi degani.

Xona havosi va tozalik

  • Xona shamollatiladimi? Qachon va qanday?
  • Poldan changni kim va necha marta tozalaydi?
  • Oʻyinchoqlar yuviladimi? Necha marta?
  • Yotoq anjomlari necha kunda almashtiriladi?
  • Xonada hid bormi? (kirganda birinchi 10 soniyada sezasiz)

Tekshirish roʻyxati

  • Oshxonani koʻrdim yoki eshikdan qaradim
  • Muzlatgich tartibli
  • Menyu koʻrinadigan joyda va har kuni oʻzgaradi
  • Bugungi ovqat menyuga mos
  • Allergiya tartibi aniq
  • Suv kun davomida ochiq
  • Ovqat majburlanmaydi
  • Bolalar hojatxonasi toza, sovun bor
  • Umumiy sochiq yoʻq
  • Qoʻl yuvish tartibi aniq va nazorat qilinadi
  • Kasal bola qoidasi yozma yoki aniq aytilgan
  • Yuqumli kasallik haqida ota-onalar xabardor qilinadi

Oxirgi maslahat

Ovqat vaqtida boring. Soat 12 atrofida kelib "bir daqiqaga kirdim" deng. Bolalar qanday ovqatlanayotganini, tarbiyachi qanday muomala qilayotganini oʻz koʻzingiz bilan koʻrasiz.

Bu bitta tashrif oʻnta savoldan koʻra koʻproq narsa aytadi.